Sabisiko champengna biji su∙aniko bang∙bate dakna man∙agita a∙doko koborrangko parakatimgipa media-ni gamchatani bidingo Intensified Mission Indradhanush 5.0 (IMI 5.0) workshopko Mongolbar salo ong∙atangaha. Ia workshop-ko Health department aro MOMENTUM Routine Immunization Transformation and Equity project baksa nangrime Shillong-o ong∙atangaha.
Bilsi sokgipa bi∙sarangko biji su∙ani gamchataniko gisik on∙a aro sabisiko chel∙chakna neng∙nikanirangko bilakatna miksonge IMI 5.0 ko ra∙gatna chanchienga. IMI 5.0 pilak biji su∙anio galchangako man∙gipa biaprangona mongsongbate bi∙sarang aro an∙o donggipa me∙chikrangko biji su∙aniko sokatanggen. Ia workshop-o National Health Mission (NHM) ni Mission Director Ramkumar S aro John Snow India ni Senior Strategic Advisor Dr Pradeep Haldar dongpae bakko ra∙angaha. Unbaksana bang∙a media-ni manderang, health officialrang, songni manderang tom∙anio bakko ra∙anikoba nikangaha.
A∙doko IMI 5.0 ni namgnini gimin banga biaprango training-rangko ong∙atangaha. Biji su∙kugijagipa bilsi bongani gisepo ong∙gipa bi∙sarangko su∙e on∙a, a∙songo gipenggipa Measles aro Rubella sabisirangko gimaatna miksonge ia biji su∙aniko dakenga. Unbaksana masina jamanchakgiparangna agan talatanirangko dake bi∙sarangko sabisioniko naljokatna chinga sanna banna niko dakenggipa dolrang baksa rakbee kamko ka∙enga ine Ramkumar S aganangaha. Covid 19 ni somoio Meghalaya a∙doko bijirangko su∙na chu∙sokani bidingoba Dr Pradeep Haldar ni agane on∙anganiko nikna man∙angaha.
