A∙doko lekka pora skiani bidingo neng∙nikanirangko namdapatna chanchirimna Hynniewtrep Youths’ Council (HYC) dolrang, Education Minister Rakkam Sangmako mijal salni bako grongangaha.
HYC dolrang a∙doko gitalgipa University ko ra∙bae on∙china, govt, non-govt skul aro college rango tangka paisa gamna nanganiko tik ka∙e on∙china dabie memorandum ko Education Minister na on∙angaha.
HYC ni General Secretary Roy Kupar Synrem ni aganani gitade NEP-2020 ko ra∙gatanio, NEHU o poraina gita CUET porikkarangko sena nanganio poraienggipa chatro chatrirangna neng∙nikanirangko on∙engani gimin a∙dokni gitalgipa Universityko ra∙bae on∙a nanga ine janapangaha. Una agreba NEHU o chubatgipa gadangrango poraina chu∙ongagita biaprang dongjani a∙selo poraigipa chatro chatrirang neng∙nikaniko man∙engani gimin uamangni mikkangchi namgnina a∙dokni skotong songjinma Shillongo gitalgipa University ko a∙bachengate on∙a nanga ine aganangaha.
A∙doko gitalgipa University ko ra∙bae on∙anichi kamgri dongenggipa chadamberangnaba dakchakani ong∙gen ineba ua agandapangaha. Captain Williamson State University, Tura o a∙bachengate on∙anina a∙dok sorkariko mittelpilan baksa Khasi aro Jaintia a∙jarangoba University ni Campus rangko chu∙gimikgipa Pro-Vice Chancellor aro Registrar ko donate a∙bachengate on∙china dabiangjolaha.
A∙doko NEP ko ra∙gatani bidingo dingtang dingtang college rangni tangka paisani gita neng∙nikanirango dakchakaniko on∙chinaba janapangaha. Unbaksana CUET centre rangko a∙doko bang∙bate ra∙bana, skulrango Aptitude aro Reasoning rangko ra∙gatna aro Manipur-o poraienggipa chatro chatrirang ko nirokatchinaba janapangaha.
