Meghalaya a∙dok ni Megha Health Insurance Scheme (MHIS) aro Ayushman Bharat-Pradhan Mantri Jan Arogya Yojana (AB-PMJAY) ko jako ra∙e kam ka∙na dokgipa phase o Reliance General Insurance Co. Ltd. (RGICL) na pakwatangaha. Ia kamko RGICL gipin company rang baksa dam rakbate tik ka∙na susagrikanio chu∙sokgipa ong∙e man∙angskaaha.
MHIS 6 ni ning∙o sanna bannanio namgnirangko man∙a aro ma∙manti insurance-ni kamrangko nipilaniko dake MHIS 6 scheme ko PMJAY baksa bakrime man∙a kragipa nokdangrangna gong 5,30,000 ko insurance-ni gita on∙a a∙dok sorkari tik ka∙angaha. Ia kamni ning∙o lakh 7 nokdangrangna sanna bannaniko dakna, porikka ra∙aniko dakna aro mikkangchi nambate nirok simsakangna gita ia insurance-chi dingtang dingtang nanganirango dakchakaniko man∙anggen ine parakataha.
