Meghalaya aro Assam a∙dokni Regional Committee rang sima ari jolrango tom∙tomani dongjaenggipaniko chanchirimna Guwahatio tom∙angaha. A·dokni Cabinet Minister, West Khasi Hills a·jani Regional Committee-ni Chairman Paul Lyngdoh, Assam a·dokni Cabinet Minister aro Kamrup a·jani Regional Committee-ni Chairman Chandra Mohan Patowary baksa golporimangaha.
Ia tom·anio a·dok damgnini Regional Committee-rang, Langpih jolo songdongenggipa manderang, songni dilgiparang aro seoke watatako man∙giparang baksa bakrime sima ari jolo donggipa manderangni neng∙nikanirangko u∙ina biapona re∙angna miksongenga. Mikkangchi meli nangrime dongnagita chanchirimaniko dake taraken ia jolo meligrikgijanirangko skang gita dake tom·tomaniona ra·bana ka∙dongsoenga ine Lyngdoh aganangaha.
Apsan neng∙nikanirangko chagrongenggipa manderangna namgipa ja∙kuko de∙na ku·pattianirangko Assam a·dokni sorkariba ra·chakangaha. Skanggipao a·dok damgnian neng∙nikani donggijagipa songrangni bimingrangko see on∙chenggen, uni ja∙mano badia songrang Meghalaya a·dokni ning∙o bak ong∙na sikenga uko parakatgen ine Lyngdoh parakangaha.
