A∙dokona manderangni niam gri napdrabaaniara bang∙a department rangni simsakgijani aro nirokgijani a∙sel ong∙a ine Congress-ni MLA Saleng Sangma matnangataha. A∙doko Infiltration branch, District Council, Labour department aro Meghalaya Resident’s Safety & Security Act (MRSSA) niamrang donggenchimoba nirok simsakanio namen bilgrienga ine Sangma agnangaha. Unbaksana niam gri napdrabagipa manderangko uamangni nirokgijanichi jakgitel ong∙e napna on∙ani a∙sel ia obostarangko chagrongna nangenga ine Sangma aganangaha.
Inner Line Permit (ILP) ko ra∙gataniko re∙anggipa somoio a∙dokni assembly-o songdongenggipa jat gittamni dilgiparang ra∙chakaha jekon kam ka∙na nanganiara ma∙mong sorkariosa pangchaka ine Sangma parakataha. Gipin a∙dokni manderang Byrnihat gita niam gri napna man∙aniko name nirokjani a∙sel ong∙a. Unbaksana manderangko dondikate sing∙sandigipa biaprangko niatgenchimode walni 9 ba 10 baji mang somoirango uamangko nirokgipa dongjani a∙selba ong∙rongbata. Ia dakgipa obostarangko nirokna man∙ja ong∙ode ILP ko a∙doko man∙a ong∙oba maming dingtangataniko ra∙bana man∙jawa ine Sangma bon∙kame aganchotanga.
