North Garo Hills a∙jani Resubelpara oni Rongrong songona re∙gipa ramarang namjani a∙sel salantio re∙ruraenggipa songni manderangna neng∙nikaniko man∙enga ine parakataha.
Ia bilsini eleksin puonani somoio a∙doko rika cho∙anirangko, rama-jal∙angrangko namdapatna ku∙rachakgimin kattarangko chu∙sokate on∙kujaengani gimin a∙jani MLA ni kamrangna suk ong∙gijanikoba songni manderang parakataha. Sorkariko rikani jadokmang batahaoba uni puonani somoio ku∙rachakgimin gita rama jal∙angrangko maming namdapatanian dongkuja ineba songni manderang janapangaha.
Songni manderangni aganani gitade ia ramarangko galchipe donani a∙sel salantio re∙ruraenggipa skul bi∙sarangna aro bajar anti re∙enggipa manderangna neng∙nikaniko on∙enga ine u∙itangaha.
Sorkarioni ia ramarangko maming taridapanirang dongjani a∙sel songni manderang an∙tangtangan jinma ku∙monge kam ka∙anirangko dake rama namgijarangko taridaprongenga ineba parakataha. Ramako re∙ruraenggipa manderang ni neng∙nikanirangko niate rama jal∙ang rangko ta∙rake taridape on∙pachina songni manderang a∙jani MLA ko mol∙molangaha.
