West Garo Hills a∙jani Jangrapara songoni bilsi 12 ong∙gipa saksa me∙chik bi∙sa Kakimchi D. Sangma ko August ni 1 tariko kragija drae til∙eke so∙otaniko jegalan baksana kalimpaaniko mesoknagita jolni NGO-rang candle light service-ko dakangaha. Iako GSU, AAYWO, AYMBS, AYWO, CRF, AHAM, FKJGP, GSMC aro FAF NGO dolrang bakrime ong∙atangaha.
So∙otako man∙gipa Kakimchi D. Sangmani nokdangni manderangna aro ma∙drang maharirangna ia kragija kamko jegale dosi dakgipa mandeni kosako ra∙ka ja∙kuko de∙e sastiko on∙china Chibinangni Chandigre kal∙chakram biapo tom∙bimonge dabianikoba dakangaha. Dosi donggipa Chanda M. Sangma ko songni manderang am∙sandiako dake pulis dolrangna u∙iate Sombar salo rim∙na man∙aha.
