Songadam aro songjinmao janggi tanganirang namen dingtanggrikanirang gnang jeon mingsa dingtanganiko angni salantio nikaniara garirangko manderangni ramarango skatang niamgri salanian ong∙a. Da∙oni chasongo nokprakon gari bolprak gnang aro mitamde nokdang ge∙saon bolgni ba bolgittam garirang donganiko an∙ching nikenga. Chadambe, dal∙a aro chona sakantini gari salaniko an∙ching nikenga indiba bang∙batan jakkalna nanggipa traffic ni niamko jarikanikode an∙ching nika dongja.
An∙chingni dakna nanggni kamara gari salani niamrangko salantio jakkalani ong∙a aro iarangko dakanichi saksa sakgipina maming neng∙nikaniko ra∙baani dongja. Indicator ba signal-rangko somoigita chel∙kalaonin jakkalaniko ranta ka∙na nanga maina rang∙gitik signalko on∙anichi ki∙sango donggipa garirang baksa a∙sel ong∙ani cholrangko ra∙bana man∙a. Auto salgiparangko an∙ching rang∙gitik dontonganina bang∙bata changon ka∙o nangronga maina uamang mande gatna seksekronga aro ong∙ona am∙gipako galona kisangchi nipilgija nengtakatronga. Auto-o gadona am∙engon manderang chel∙kalaonin jak songsona nanga jedakode auto salgipa chel∙aonin nikate signalko on∙sona man∙gen. Apsan daken ong∙onani somoioba chel∙kalaonin ong∙ona am∙gipa biapko auto salgipana u∙iatode uamang ki∙sangchiko nipile neng∙takatna man∙gen.
Garirangko donanioba an∙ching biap nigija rama jangchi ong∙pile donaniko bang∙bata changon nikronga. Rama dal∙begipa ong∙genchimoba garirangko samtangtango donanichi gipin garirangna re∙nagita neng∙nikanirangko an∙ching nikna man∙a. Bajar antirango mande bang∙begipa a∙damrangoba garirangko mikkang ki∙sang nigija tarake salanganiko bang∙bata changon an∙ching chagronga. Walni somoirango light rangko natbrake salanikoba nikronga, iani a∙sel mikchretaniko man∙e sakgipin manderangna namen neng∙nikaniko ra∙baa. Indake simsakgijaniara manderangna neng∙nikakosan ra∙baa ong∙aigija a∙selko ra∙baaniba ong∙a.
Iarang pilako ja∙rikna an∙chingo dongna nanggipa gun ara sengna man∙ani aro chakchikani donggipa ong∙na nangchongmota. Sengna man∙gijagipa aro chakchikna man∙gijagipa mandeko an∙ching rama apketao garirang re∙jitna biap dongjaoba horn on∙bekanio ma∙sina man∙a. Ia chonchongipa niamrangko ja∙rikgenchimode an∙ching bang∙a a∙selrangoniko naljokatna aditanade man∙chongmotgen ine anga bebe ra∙a.
