Tura Don Bosco Collegeo, West Garo Hills a∙jani District Legal Services Authority aro Don Bosco College ni Political Science Department bakrime Legal Awareness Programmeko mijal salni bako ong∙tangaha. Ia program-o dingtang dingtang niam ni bidik jekai Traffic ni niam ko ja∙rikani, M.V Act, NDPS Act, POCSO, Free Legal Services, Lok Adalat, Mediation and Mental Health rangni gimin chatro chatrirangna agan-talate on∙angaha. Ia programme ko Tura Bar Association ni advocate Jeriko Marak ni rimchaksoanichi Don Bosco College ni Principal Fr. Bivan Rodriques Mukhim ba bakko ra∙angaha.
Traffic ni niam ko ja∙rikani, M.V Act, NDPS Act ni bidingo aro Garo Hills a∙jao pekgipa bosturangko jakkalani barioroengani gimin District Legal Services ni Legal Aid Counsel ni Achintya Hajong skie on∙angaha. Protection of Children from Sexual Offences (POCSO) ni gimin District Legal Authority Services ni Chief Legal Aid Defence Counsel ni Rania K Marak talate on∙angaha. Unbaksana Advocate Grangchira Ch. Marak gisik ni gita an∙seng baljokani gimin skie on∙angan baksa chadamberangna ku∙pattianikoba on∙angaha.
Ia programme ko ong∙atanichi chatro chatrirangna niamrangko ja∙rike songsalo janggi tangani gimin District Legal Services ni skie on∙anichi talbate u∙iataniko on∙a dakchakangaha.
