Re∙anggipa Sukrobar salo, FKJGP- ni secretary Matsrang Sangma, skul bi∙sarangko bus conductor ni bus o gadona on∙gija champenganirangko social-mediarango giproroenganiko niksoe, bus salgiparangona re∙ange sing∙sandianiko dakani ja∙mano, gitalgipa traffic rule ko a∙jao ra∙gatani a∙sel Motor Vehicle Act (MVA) 179(1) ni gita bus o chadenge songregipani gimin niamko ja∙rikjaenga ine tangka gong 2000 ko gari no. ML 08 F0734 oniko re∙anggipa May jani 27 tariko dai gamataha ine u∙ina man∙aha.
Uni gimin ua West Garo Hills a∙jani DC Jagdish Chelani na bus o chandenge songreenggipa ni gimin dai gamataniko dakjachina mol∙mole chitti sedoataha. Ia gitalgipa niamko ra∙gatani a∙sel salantio skul re∙ruraenggipa bi∙sarangna neng∙nikaniko man∙enga ni a∙sel ia niamko Garo Hills ni pilak a∙jarangon olgrokatchina ba mol∙molataha.
