Arunachal Pradesh-ni skotong songjinma Itanagar-o August 16 oni 19 tarikona ong∙atenggipa Yonex Sunrise North East Zone, Inter State Badminton Championship kal∙susaaniko da∙aloni a∙bachengataha. Ia susaanio bak ra∙nagita Tura songjinmaoni sakgni chadamberang bilsi 20 ong∙gipa Gitchiak Bregim Sangma aro bilsi 22 ong∙gipa Chirag Agarwal seokako man∙aha. Ia kal∙susaaniko Badminton Association of India (BAI) ni ning∙o donggipa Arunachal State Badminton Association (ASBA) ong∙atangenga.
Susaanio bak ra∙na re∙angenggipa chadamberangko nirok skie on∙chinagita badminton kal∙aniko skigipa saksa Salrak N Marak-ko uamang baksa re∙angpana seokako man∙aha. Seokako man∙gipa chadamberang batanggimin salrango Nongstoin-o badminton kal∙susaaniko ong∙atanggipao name dakmesokanina seokako man∙aha. Da∙o uamang a∙dokni aro a∙jani gita re∙ange kal∙susaanio bakko ra∙angskaengaha.
