Chief Minister’s Digital Learning Aid for Students Scheme ni ning∙o Williamnagar songjinmao chatro chatrirangna Digital Learning Aid (M-Tab) rangko da∙al salni bako skotong Minister Conrad Sangma suale on∙angaha. Ia M-Tab rangko jakkale chasongni kri poraia skianio nambate u∙ie ma∙sie ra∙chinagita aro dingtang dingtang namgnirangna jakkalchina chatro chatrirangna didianiko on∙angaha. Ia program-o Williamnagarni MLA Marcuise N. Marak, Deputy Commissioner Vibhor Agarwal aro adita department ni officerrangba dongpae bakko ra∙angaha.
Unbaksana East Garo Hills a∙jani game cha∙giparangna Spice Mission-ni ning∙o dal chini bol bi∙sarangkoba suale on∙angjolaha. Lakadong Mission-ni chu∙sokaniko niknagita man∙e dingtang dingtang moslarangko tarigipa bolrangko ge∙na sorkari am∙sandianiko dakenga ine Conrad Sangma aganangaha. Spice Mission-nigita ge∙e game cha∙giparangni dakchakaniko on∙a aro uamangni gamani gadangrangko namdapatna bang∙a cholrangko ra∙bae on∙a jotton ka∙enga ine Sangma agandapangaha.
Mission Organic Value Chain for Development of North East Region (MOVCD-NER) ni ning∙ao Bolero Pickup gitalko EGH District Horticulture Office na Chief Minister oprake on∙angjolaha.
