A∙doko rama jal∙angrangni nosto ong∙ninganiko bang∙en nikna man∙engani gimin aro ramarangko name tarianiko nikjani a∙sel High Court uamangni chu∙ongnikgijaniko parakataha. Agia-Medhipara-Phulbari-Tura (AMPT) ramako mongsongbate janape re∙anggipa sal somoirango PIL ka∙anio pangchake mijal salni bako aganangaha.
Meghalaya a∙dok chijimkamgipa biap ong∙ani gimin rama jal∙angrangko tarianio namgipa bosturangko jakkalnagita nanga jedakode mikka jimbee wagenchimoba mangrake baikame dongna gita man∙gen ine Meghalaya High Court ge∙etaniko on∙angaha.
Mikka wa∙ani a∙sel rama jal∙angrangni nosto ong∙aniko pa∙sikaniara ra∙chakna man∙gijani ong∙a ine HC u∙iatangaha. Gari gorarang rama jal∙angrangko wachi kariomangba maming neng∙nikagri jakkalna man∙agita Public Work Department (PWD) ni officer-rang court ni ge∙etanirangko gisiko done mikkangchi kamrangko ka∙anggen ine Division bench ka∙dongsoaniko parakangaha.
