A∙dok sorkarini chalaienggipa hospitalrango doctor aro nurse-rang chu∙ongagita dongjaengani gimin Health Department bilsisana kamona rimnapaniko dakna gita tik ka∙angaha ine mijal salni bako EKH ni MLA rang baksa chanchirimanio Health Minister Ampareen Lyngdoh aganangaha.
A∙doko staff nurse rang ko bilsi sana kamo rimnapna gita a∙dokni dingtang dingtang a∙jarangona chu∙gimik sak 288 staff nurse rangni biapna kam nakatatmanaha aro uamangko kamona rimnapaniko ta∙raken dakanggen ine Ampareen Lyngdoh aganangaha.
Unbaksana hospitalrango, PHC aro CHC rango sanna bannaniko dakna chu∙ongagita bosturang aro samrang dongjaengani gimin ba chanchirimangaha. Sanchakram biaprangona chu∙ongagita bostu aro samrangko sokatna, a∙dok sorkari jakgitelgipa agency Meghalaya Medical Drugs and Services Limited ko songe on∙aha ine Lyngdoh u∙iatangaha.
