Election ni somoio dongimin niamko ja∙rikja ine matnange Williamnagar ni MLA Marcuise N. Marak ni kosako Garo Hills ni Social Activist Tennydard M. Marak ni badi ka∙doaniko High Court ra∙galataha ine koborna parakataha. MLA ni kosako badi ka∙doaniko court jako ra∙e kam ka∙na man∙jawa aro uko ra∙galna amgipa ong∙a ine Justice HS Thangkhiew aganangaha. Badi ka∙anio janapgimin ja∙pangrango pangchake gong hajal chibongako Meghalaya State Legal Service Authority na sal 15 ni gisepo gamna ge∙etate ra∙galataha.
Unbaksanaba Marcuise Marak a∙dokni Election Commission, Chief Electoral Officer, gipin officialrangko uamangni nirokgija kam ka∙anina badi ka∙chapangjolaha. Tennydard Marak MLA ni kosako April 3 tariko adita matnanganirangko man∙soe badi ka∙doangaha. Section 80, RP Act 1951 o pangchake election ni mamlao maiba sing∙doanirangko dakna HC nasan bilko on∙manaha jeon ia kamrangko ka∙aniko article 329 (b) o ra∙galmanaha aro Marakni badi ka∙aniko rakkina amgijagipa ong∙a ine parakataha.
