Da∙al salni bako South Garo Hills a∙jani Baghmara songjinmao World Elephant Day-ko gisik ra∙e Wildlife Trust of India baksa nangrime maniangaha. Ia manianiona a∙jani DC Shivansh Avasthi, District Wildlife Officer aro Social Forestry-ni Officer rang mongsonggipa sokgipa ong∙e bakko ra∙angaha. World Elephant Day-ko ong∙atani miksonganiara Mongmarangko skatang goe siataniko champenge rakkina aro da∙ororo sima ari jolo donggipa manderang Mongmarangni jakchi kal∙aka man∙aoni naljoke dongna cholrangko agantalate on∙angna re∙mikkangani ong∙a.
Mongmarangko rang∙gitik chagrongani somoirango nanga ja∙kurangko de∙e dakna nanggni aro dakna nangijanirangkoba talate skie on∙anirangko dakangaha. Ia salko manianganio robol kal∙susaanikoba nikangna man∙aha. Ia somoio bang∙a songni ma∙apaarang, chadambe aro skulni chatro chatrirangba re∙bae bakko ra∙angpaaha. Mongma aro mandeni janggi tangrimbaani ru∙utbea bilsirangonin ong∙a jekon ia manianio uamang baksa meligrike nangrime dongani bang∙a skidapanirangkoba songni manderangna agantalate on∙angjolaha.
