Tura songjinmao donggipa College of Community Science o te∙brongoniko ma∙manti cha∙ani aro ringani bosturangko tarina gitalgipa kolrangko jakkalna skie on∙agita training program-ko ong∙atangaha. Ia program-ko Food Science & Nutrition Department jako ra∙e MBDA, PRIME aro DCIC ni dakchakaniko man∙e ong∙atangaha. Training program-o college ni Assistant Professor Dr. Nathasa R. Marak bak ra∙gipa sak 200 na bate manderangna gital kolrangko jakkalani cholrangko skie on∙angaha.
Ia college bang∙a ge∙e game cha∙gipa manderangna dingtang dingtang gadangnigita dakchakaniko on∙enga aro bading chiwalani, an∙tangtangna dake cha∙ani cholrangko skie on∙enga. Garo Hills o ia gamchatbegipa collegerangoni ge∙sa ong∙a aro ian manderangni janggi tanganiko tang∙doatna dingtang mancha changa sapaniko on∙enggipaba ong∙a.
College-ni ia namgipa kamna bon∙kamgipa salo WGH a∙jani District Horticulture Department Thera Ch. Marak re∙bae college ni Dean Dr. Jyoti V Vastrad ko mittelpilanikoba dakangaha.
