Da∙al salni bako, Dadenggre songni wilwilao donggipa schoolrangni chatro-chatri rangna uamangni SSLC aro HSSLC porikkao name dake chu∙sokgipa ong∙anina Dadenggreni gitcham MLA aro da∙o ong∙enggipa MIDC-ni Chairman, James K Sangma adita tangkarangko Certificate baksa on∙e mande ra∙aniko dakangaha. Ia programme o Jengjal ni MDC Grahambell Sangma, SDO Abhishek Gowda, BDO, School-ni Principal rang aro toromko dilenggiparang bakko ra∙angpaaha.
Mikkangchi Dadenggre-ni silroro namroanina coaching centre, career counseling, competitive porikkarangna jekai UPSC, MPSC, NEET, CUET aro uandake dingtang dingtang gadango porikkarangko see chu∙sokgipa ong∙na skie on∙anikoba dakanggen ine James Sangma koborko on∙giparangna parakataha.
