Demdema Block ni ning∙o donggipa songni manderang nangchongmotgipa Village Employment Council (VEC) rangko songe on∙kujani a∙sel MGNREGA ni gita salanti kam ka∙e cha∙enggiparang kamgri ong∙engaha ine saksa social activist Chief Minister Conrad Sangma na chitti sedoataha. Uni chittio janapatani gitade Phulbari Constituency ni ning∙o donggipa manderang 80 percent ni gitade salantina hajira ka∙e cha∙giparang ong∙a. Indake ong∙genchimoba VEC ko songe on∙kujani a∙sel songni manderang MGNREGA ni kamko ka∙na man∙jaenga aro neng∙nikanirangko man∙enga ine janapataha.
A∙jani MLA Abu Taher Mondal jean Community and Rural Development Minister ong∙genchimoba nirokanirang dongjaenga ine aganaha. Ua jolo sak hajal 17 mang job card gnanggipa manderang donggenchimoba, politics o kam ka∙giparangni sinjetaniko man∙ani a∙sel iani bidingo nirok simsakanirang dongjaenga ineba janapataha.