Re∙anggipa sombar salo, Garo Graduate Union (GGU), a∙dokni reservation policy 1972 ko nipilna nangani katta dongja ine memorandum-o janape Chief Minister na sedoataha. Reservation policy ko namdapatani ja∙kurangko de∙anian da∙alo nangchongmotgipa kam ong∙enga aro darang jatnan mikkang niteani dongna nangja ine uamang janapataha.
Reservation policy 1972 ko jekon a∙bachengaoni on∙ahachim uagitan dakangkuna nanga aro iako nipilna rai on∙aniara A∙chik jatna aro chadamberangna mikkangchi neng∙nikani aro kenbegni ong∙gen ine uamang agantalataha.
A∙dokni High Court ni roster system ko ra∙gatna ge∙etaniko Cabinet ni ra∙chakanian namgipa re∙mikkangani ong∙a, jeon bilsi 50 o dakgualanirangko nipilna man∙gen aro A∙chik jat an pilak kamrangko man∙ani bidingo ja∙manchakbatgipa ong∙a ine uamang parakataha. Unbaksana uamang expert committee-ni nipilaniko ra∙chakna amgijaniko parake, sorkariko iani bidingo nama ja∙kuko de∙china didiangaha.
