Tura Government College ni National Service Scheme (NSS) dolrang mijal salni bako National Sports Week manianiko ong∙atangaha. Ia manianiko a∙songo Hockey kal∙na changbegipa Major Dhyan Chand ni atchiani salko gisik ra∙e ong∙atangaha. A∙song gimiko uni atchiani salko chongmotan August 29 tariko National Sports Day ine done bilsiantin manirongenga.
Maniani bako NSS dolni me∙a aro me∙chikrangna basketball kal∙susaanirangko ong∙atanikoba dakangaha. Kal∙susaanirangchi songsalni chu∙gimik an∙seng baljokanina ba “Sports as an enabler for inclusive and fit society” ine katta bichongko done uno pangchake ia programko ong∙atangaha. Ia program o Collegeni Principal in-charge Lucietha K. Sangma, college o skigiparang, NSS o dangdike on∙giparang aro collegeni chatro chatrirang bakko ra∙angaha.
