Meghalaya State Reservation Policy 1972 ko nipiltaina Expert Committeeko seokanio a∙doko songdongkamgipa Khasi, Jaintia aro Garo jat onikosa seokna nanga ine Leader of Opposition Ronnie V. Lyngdoh aganangaha. Megahalaya a∙doko kamna jatgittam ni giseposa sualgrikaniko dakengani gimin kamna neng∙nikanirang aro nangnikanirangkoba ma∙sibatgipa ong∙a ineba Lyngdoh aganangaha. Sorkarini seoke songgimin Committee ni member rang kim∙kim ong∙e kamko ka∙anggen ine ka∙dongani kattarangkoba Lyngdoh janapangjolaha.
A∙dok sorkarini ku∙wattimgipa Ampareen Lyngdoh ni u∙iatani gitade Expert Committee ko dilnagiparangara Madhya Pradesh High Court ni gitcham judge Justice Mool Chand Garg Chairman ni kamko jako ra∙anggen. Unbaksa Allahabad High Court ni gitcham judge Dr. Satish Chandra, NEHU Sociology Department ni Prof. DV Kumar, Mumbai ni Department of Fertility and Social Demography, Indian Institute of Population Sciences ni Prof. Chander Shekhar aro Economics & Public Policy IIM Shillong ni Assistant Professor Subhadip Mukherjee bakrime dilanggen. Ia Expert Panel-o songdongkamgipa jatrangoniko seokjani miksonganiara jatgittamoniko maming mikkang nitea gri kam ka∙angna man∙gen ine Ampareen Lyngdoh parakangaha.
