59-Chokpot Constituency ni ning∙o donggipa Khakkija songni PWD-ni rama namsrangjani a∙selo salantio re∙ruraenggipa bus garirang re∙na man∙jahani a∙selo songni manderang neng∙nikaniko man∙enga ine u∙iataha. Re∙a doanio neng∙nikani gimin ua jolni manderang an∙tangtangni kamko galpile biltang jaktangchi ramarangko mijal salni bako tariangaha.
Meghalaya a∙dokko man∙ani bilsi 50 batpiloba ia ramarangko tarigija galchipe donani a∙selo bilsiantian wachikarini somoirango ua jolo songdong a∙chagiparang aro poraienggipa chatro chatri rangna re∙a doanio namen neng∙nikaniko man∙enga. Ia rama Chokpoto-ona 8 km san ong∙genchimoba tarie on∙anirang dongja ine songni manderang janapataha. Unbaksana uamang a∙jani MLA Sengchim N. Sangma, MDC Sengbirt R. Marak, Public Works Department (PWD) aro Chokpot jolni NGO rangko niroke kam ka∙atpachinaba mol∙molaniko dakataha.
