Dam gni Shillongni Nursing College rangonikosan Mid-Level Health Providers (MLHP) ni kamna rimnapaia aro Garo Hills ni saksakoba rimnapjani gimin jegalatanirangko National Health Mission agantalataniko dakangskaaha.
Ia kamna rimnapaniko Health and Wellness Centre ni gita Ayushman Bharat Comprehensive Primary Health Care ni niamo pangchakesa kamko ka∙angaha ine u∙iataha. SHC-HWC rango kam ka∙giparangara MLHP rangan ong∙a jeon B.Sc Nursing Integrated course baksa jadokna Community health nigita certificateko namgipa bidani a∙damo matchotgiparang kamko ka∙nagita amma. Meghalaya a∙doko dam 460 mangnigita Sub Centre aro Wellness Centre rang gnang. Damprak centre rangnan MLHP rangko nanga indiba ua chu∙gimik centre rangoni sak 376 MLHP rangsan dongaia. Bang∙a MLHP rang NHM ni a∙palo jekai private, government ba dingtang dingtang sanchakram biaprango kam ka∙na ong∙katani a∙selo da∙o gapatkugija biaprang ge 84 ona tang∙doaha ine u∙iataha.
Ia gapatkujagipa biaprango gapatnagita aro manderangna dangdike on∙aniko dontongatjana gita NHM office oni ia damgni Nursing College jean NEIGHRIHMS aro Woodland Institute of Nursingni chatro chatrirangkosan kamo rimnapnagita chittirangko sokataha ine u∙iataha. Ua damgni collegerangnasan u∙iataniara MLHP ni kamo dangdike on∙a ia damgni skie ra∙chakramrangsan sokarini gita ra∙chakgimin poraichakram ong∙a ine u∙iataha. Meghalaya a∙doko ua damgni college na agre changa sapanio skie on∙gipa dongkujani giminsa ua collegerangoniko seokaha ine u∙iataha. Ian campus ning∙osan kamna rimnapgipa kam baksaan apsanaia jekon HWC ko chalaina NHM ni nangchongmotgipa dakchakani ong∙a ine janape aganaha.
Re∙anggipa bilsirango jemangan GNM aro B.Sc course rangko matchote donggiparangko Community Health for Nurses jadokni programme ko IGNOU ba entrance porikkarangko see matchotatchinaba u∙iataniko on∙manaha. Jemangan jadokni course ko matchotahachim uamangko primary healthcare dolko dilchinagita Sub-Center rango kamna ra∙napskaaha ine parakataha.
Unbaksana Garo Hills ni a∙jarangna MLHP ge 50 mangnigita gapatkugija a∙kange dongipa biaprang dongkuenga ineba parakataha. NHM ni gita Garo Hills a∙jani dingtang dingtang Health and Wellness Sub-Centre rango, September 4 tariko Women’s Working Hostel, WGH-o sak 21 manderangko kamna rimnapaniko dakanggen ineba parakataha.
