Animal Husbandry aro Veterinary ni Minister AL Hek, Garo Hills ona re∙bae sorkarini dingtang dingtang on∙gimin schemerangko nirokaniko dakangaha. Unbaksana a∙jao kam ka∙enggipa department ni District Veterinary Officer aro Farm Manager rang baksa agangriaknirangkoba dakangaha.
A∙doko manderangni jila kaanirangko dake cha∙enggiparangko tang∙doatna dakchakna rake kam ka∙na officialrangko Hek didiangaha. Wak aro matchurangko jile cha∙enggiparangna wak bi∙sa aro matchu bi∙sarangko suale on∙angchinaba aganangaha. A∙dok sorkarini gita jila kaanirangko donchakram pilak biaprangon jila kaanirangko bariatnaba didiangaha. Central Dairy Plant, Ganol o Milk Parlour-ko Minister ni jakchi oprake on∙angaha jean namgipa aro gitalgipa dutrangko a∙jani pilak biaprangona sokatna dakchakanggen. Una agreba kam ka∙enggiparangna dongchakna rikgipa nokkoba oprake on∙angan baksana da∙o rikenggipa 10,000 litre dutrangko chimongchakna tarigipa biapkoba niangjolaha.
AL Hek Rongkhon o donggipa Poultry Farm ba do∙o jilchakram biap ko nirokange rika cho∙anirangko namdapatna nanganiko aro man∙gnirangko bariatna miksonge kam ka∙na nanganirangko janapangaha. Central Dairy Plant, Ganol oniko Jersey, Red Sindhi, Holstein Friesian, Sahiwal, Tharparkar, Gir, Ongole, matma aro matchuni jatrangni bi∙sa ba∙atani bitchirangko man∙agita amgen.
Unbaksana Rashtriya Gokul Mission ni gita a∙bachengatgipa Artificial Insemination (AI) na kam ka∙gipa manderangna bike rangkoba suale on∙angaha.
