Garo Hills ni dingtang dingtang a∙jarango National Sports Day ko mijal salni bako manianganiko nikangna man∙aha. Ia salko Hockey kal∙na changbegipa Major Dhyan Chand ni atchiani salko gisik ra∙e National Sports Day ine done bilsiantian manianiko dakrongbaenga.
Ia salko manianigita officerangona ja∙achi re∙ani aro cycle rangko jakkale salanikoba dakangaha. Una agreba chadamberangna aro bi∙sarangna katsusaani, basketball, boxing aro dingtang dingtang kal∙susaanirangkoba District Administration, District Sports Office aro District Commissioner dakdilangaha.
National Sports Day ni salko manianio sports ko kal∙e a∙songna aro jatna mikkim rasongko ra∙bagiparangko aro chadamberangko kal∙susaanio gisik nange bak ra∙china miksonge dakdilangaha.
Kal∙susaanirangko kal∙e chu∙gimik songsalni an∙seng baljoke donganina aro be∙en bimangni mangrakanina batanggimin salrangonin National Sports Week koba ong∙ate kal∙susaanirangko ong∙atangaha.
