GHADC o kam ka∙giparang ja kolatchini dormaharangko on∙kujaengani gimin CEM Albinush R. Marak ko gronge uamangni man∙a nanggiparangko on∙china mijal salni bako mol∙molangaha. Uamangni neng∙nikaniko September 15 na skang niatjagenchimode raka ja∙kuko de∙e jingjengataniko dakanggen ine parakangaha. Da∙onaba uamangni dormaharang 4th Pay Commission on ong∙kuenga jekon dilgiparangni nirokjani a∙sel 5th Pay Commission o napata dongkuja ine Non Gadgeted Employees Association (NGEA) ni dilgipa Brithen M. Sangma parakataha.
GHADC ko dilgiparangni simsakgijanichi uamang an∙tangtangni nokdangrangko chalaina aro bi∙sarangna skulni nanganirangko chu∙ongagita on∙a man∙jae neng∙nikaniko man∙enga ine parakangaha. Batanggipa chango ong∙anggipa MDC rangba uamangna dormaharangko on∙a ku∙rachake ra∙chakoba on∙angjaha aro da∙o ong∙enggiparangba bilsi bonga bon∙a am∙pilomangba on∙kujaenga ine NGEA ni dilgiparang aganangaha. Iarangko chagronge uamang kamko ka∙naba neng∙nikaniko man∙engani gimin dormaharangko ta∙raken on∙pachina didianiko dakangaha.
