West Garo Hills a∙jao Selsela songni ning∙o Public Health Engineering (PHE) Division office ko a∙bachengate on∙china aro Water supply scheme-ni ning∙o chi watruraenggipa siltongrang nosto ong∙enganiko ta∙rake taridape on∙china da∙al salni bako Selsella-ni A∙chik Students’ Welfare Association (ASWA) dolrang PHE ni Minister Marcuise N. Marak na chitti sedoataniko dakangaha.
Selsella songo PHE office dongjani a∙selo aro chiko watna jakkalgipa siltongrangni nosto ong∙anirangkoba taridape on∙ningjaengani a∙sel Selsella songni ning∙o songdongenggipa nokdangrang batanggimin bilsirangonin chi jakkalanio neng∙nikanirangko chagrongenga ine u∙iataha. Damalgre aro Amguri jolo ru∙utbea somoina Deep Tube Wells (DTW) ni nosto ong∙e dongengani a∙selo chiko man∙a gita neng∙nikenga jeon water supply scheme o pangchake janggitanggipa manderang neng∙nikanirangko chagrongenga. Ia neng∙nikanirangko olgrokatna gita nosto ong∙e dongenggipa DTW rangko ta∙rake tarie on∙pachina ASWA dolrang chittio janape mol∙molaniko dakangaha.
