Da∙al salni bako Tura songjinmani Walbakgre Secondary skulo dingtang dingtang u∙ina nanggipa niam bidikrangko WGH a∙jani District Legal Services Authority (DLSA) skulni chatro chatrirangna ma∙siate on∙a Legal Awareness Program ko ong∙atangaha. Ia program o DLSA ni Legal Aid Counsel Grangchira Marak a∙selo ga∙akgiparangna tangka paisa nanga gri niamo pangchake dakchakani cholrangko man∙a ammani aro dakna nanggnirangko u∙iate on∙angaha. Bilsi sokkugijagiparangna dingtang mancha simsakaniko aro naljokani cholrangko u∙iatan baksana bi∙sarangko namgija kamrangoni chel∙e dongnagitaba talate on∙angaha.
Bilsi chu∙onggija an∙o dongani namgijanirangko aro a∙sel ong∙aoni naljoke dongna mikrakataniko DLSA ni Chief Legal Aid Defence Counsel Rania K. Marak agantalate on∙angskaaha. A∙doko chadambe bi∙sani kosako kragija kamrangko ka∙ani batroroengani gimin POCSO Act ko talate on∙angan baksana pekgipa bosturangko jakkalani bidingoba Narcotic Drugs & Psychotrophic Substances (NDPS) Act 1985 o pangchake talate on∙angjolaha. A∙songo songdongenggipa manderangna on∙gimin bil aro jakkalna nanggipa niamrangkoba ia somoio skie on∙angaha. Ia program o skulni Priincipal, skigiparang, chatro chatrirang aro Walbakgre N.N.S.C Youth ni adita dilgiparangba dongpae bakko ra∙angaha.
