Batanggimin salrango Bharatiya Janata Party (BJP) ni ku∙wattimgipa HM Shangpliang ni National People’s Party (NPP) baksa barkrimna miksongenga ine agananiko BJP rang da∙al salni bako jegalataha. Shangpliang ko NPP o bakrimna miksonganirang gnang ine agananiara Deputy Chief Minister aro NPP ni dilgipa Sniawbhalang Dhar ni kattarangsa ine BJP ni dilgiparang u∙iataha.
Re∙anggipa Budbar salo Shangpliang ko gronge agangolpogrikanio, NPP o napna miksongenga ingipa kattara kakket ong∙ja ine ma∙sina man∙aha aro Dhar an∙tangni gisiko chanchianikosan aganaha ine BJP dolni dilgipa AL Hek parakataha. BJP dolrangni Shangpliang ko agantalate on∙china ja∙ku de∙ani koborrang mai ong∙angenga ine sing∙aniko dakon ia mamlani bidingo party nigrike kamko ka∙anggen ine BJP ni dilgipa aganangskaaha.
