Niksamso Garo Community Organisation (NGCO) Southern Zone, Baghmara-o Captain Williamson Memorial College Hostel ko rikenggipa namsrangjahani gimin raken jegalaniko dakataha aro uko name tarie on∙pilchina didianikoba dakangaha. Uamangni agananigitade, ia hostel ko rika matchotsrapgijaan nosto ong∙na a∙bachengengaha ine parakataha. Ia hostelko jako ra∙e rikenggipa contractor ko uamang kraa bewalo nitoe aro namgipa bosturangko jakkale name rike on∙chinaba mikrakataniko on∙angaha. Kamrangko name ka∙e on∙jagenchimode contractor ni kosako raka ja∙kuko de∙anggen ine uamang parakangaha.
NGCO Southern Zone-ni President Arjun Ch. Marak-ni janapatani gitade ia hostelko contractor an∙tangni skagita skatang rikchigrange galani gimin suk ong∙gijaniko janapate, mikkangchi kam tik ong∙gijagipa contractor rangko biming den∙gale galna nanga ine didiataha. Unbaksana Captain Williamson Memorial College Hostel-ko rikenggipa contractor-ni kosako sing∙sandianiko dakna nanga ine NGCO dabiangaha. Garo Hills ni tang∙doaniko indakgipa contractor rangan ra∙one galenga jekon district administration raka sasonko ka∙e bichalna nanga ine NGCO dol parakangaha.
