Re∙anggipa August jani 31 tarikni wal 10 baji mangni somoio East Garo Hills a∙jani Williamnagar Jawahar Navodaya Vidyalaya o poraienggipa chatro saksako uni senior rang chadrape doke sate saknaata ine u∙iataha. Koborna parakatanigitade chadrapgipa manderang, uko uamangni room ona rimange doka sataha aro jimbee saknaa man∙ani a∙sel uko Williamnagar Civil Hospital ona sanna bannaniko daknagita rimangaha ine parakataha.
Saknaa man∙gipa chatro Class X ni gadango poraienggipa bilsi 16 ni bi∙sa ong∙a aro uko chadrapgipa chatro rang Class XI aro XII ni bi∙sarang ong·a ineba u∙iataha. Nambate sanna bannaniko daknagita Tura songjinmaona uko rimbaaha. Ia obosta ong∙anina saknaa man∙gipani nokdang jak donggipa manderangko pulis rango mokordoma ka∙doangaha ineba parakataha.
East Garo Hills a∙jani Deputy Commissioner Vibhor Agarwal ni parakatanigitade ua bi∙sa ko sak 7 senior chatrorang doka sataha aro ia a∙selo bak donggipa sak 10 rangba gnang ine ua aganangaha. Iani biding doka man∙gipa bi∙sa ni skul ni dilgiparangna u·iatani ja∙mano uamangko suspend ka∙angaha ineba DC u∙iatangaha.
Gipin chatro chatri rangni agananigitade skulo adita somoinan indake kal∙ake roanirang re∙anggipa somoirangoba bang∙bata bi∙sarangan chagrongangaha ine u·iataha. Ia ong∙anggipa a∙selni bidingo JNV skul ni dilgiparang tom∙aniko dake mikkangchi indakgipa obosta ong∙aniko champengna chanchirimnaba tik ka∙angaha.