Mijal salni bako Pulis dolrangko aro District Administration ni official rangko ro∙ong goanina, unbaksana Section 144 CrPC ni niam rangko pe∙anina Hynniewtrep Integrated Territorial Organisation (HITO) ni sak 10 member rangko rim∙aha. Ia golmal ong·anio sak gittam pulis dolrang jeon sak gni DSP rang adita saknaaniko man∙aha aro sak gni District Magistrate rang jeon saksade me∙chik ong∙a, uamangko bilakbee jipakanirangkoba dakangaha ine u∙iataha.
Ia jingjenganiara HITO ni President Donbok Dkhar ko, uamang dolni gisim ba∙ra rangko gane IPC ni Section 171 ko pe∙anina Sardar pulis station ona bichalna okamatahani bidingo ong∙aha. Iani bidingo uamang re∙jomaniko dakaha aro kragija kamrangko niamni a∙palo ka∙ahanina pulis dolrang tear gas rangko goaona sokaha ine parakataha.
HITO ni sak 40 ba 50 mangni gita member rang uamangni President-ni dilanichi SMB parking ona niamgri napdrae tom∙dakaha ine EKH a·jani SP Sylvester Nongtnger u∙iataha. Magistrate, tom·dake dongenggipa manderangko, uamangni dilgipa Dkhar ko pulis station ona re∙ange sing∙anirangna aganchakaniko dakna on∙china ge·etanirangko dakgenchimoba knachakgija batesa Police Bazar gita pulis station ona re·jomanganiko dakangskaaha ineba SP agandapangaha.
Dkhar ni aganchakanirangko dakmane ong∙katbaon Sardar pulis station ni mikkango tom∙dakenggipa manderangko tom∙tome re∙angchina aganon uamang drae Secretariat ona re∙jomangskaaha. Adita beng∙anirangko dakgenchimoba uamang ding∙chaoe officer rang aro pulis rangko jipake chadrapna a∙bachengaha ine SP u∙iataha. Uamang ro∙ongrangko gona a∙bachengaha aro pulis dolrang saknaaniko man∙aha jeon DSP koba sko o ro∙ong nange saknaaniko man∙angaha. HITO dolrang ka∙o nangbee Khyndailad jolni dokanrangko drae chipchina agane pulisrangko jegale chrik a∙bokanirangkoba dakangaha ine SP aganangaha.
