August 6 tarikoni a∙bachengatgipa bilsi 19 ni ning∙o ong∙gipa me∙chik chadamberangni cricket kal∙anio North Garo Hills aro East Garo Hills a∙jani gisepo kal∙susaaniko dakangaha. Dolgnini gisepo kal∙susaanio NGH a∙ja EGH ni kosako chegipa ong∙na man∙aha. Kal∙a gimiko 148 run rang sakchet mang wicket rangko ga∙akate NGH a∙ja EGH na tariaha. Run rangko chena rikenggipa EGH a∙ja chu∙gimik wicket rangko ga∙akate 75 run kosan man∙aha. NGH doloni robol gogipa Julitha Sangma saksni wicketrangko ra∙e dokenggipa dolrangna neng∙nikataniko on∙angaha.
Apsandaken Umbuda Ri-bhoi o kal∙enggipao South West Khasi Hills aro Ribhoi a∙jani kal∙susaaniko nikangaha jeon Ribhoi chegipa ong∙aha ine koborna parakataha. Meghalaya a∙doko dol chikking Meghalaya Cricket Association (MCA) baksa bakgrimgipa District Cricket Association (DCA) a∙jani dolrang kal∙susaaniko dakangenga. Ia cricket kal∙susagrikenggipako damgni biaprango ong∙atangenga chong·moton Ribhoi Umbuda aro NGH Salpara songo ong∙a.
