A∙chik Organisation for Social Welfare (AOSW) Head Quarter Williamnagar, South Garo Hills a∙jani Chokpot Dareng chibima Budugre songoniko niam gri ro∙ong bikotenggipani bidingo bil gnanggipa departmentrangko raka ja∙kuko de∙china didiataha. AOSW dolni janapatanigitade niamgri ro∙ong bikotenggipako re∙anggipa June 20 tarikon dontongatchina aganoba da∙ona kingking dontongatkujaenga ine u∙iatangaha. Ia niamgri kam ka∙anichi Dareng chibimanasan nosto ka∙aniko ra∙baaigija da∙o mat aro pilak janggi gnanggipa jonturangko aro bol wa∙arangko nosto ka∙aona ra∙baenga. Ia abri jolrang aro chiring chisamrangara Garo Hills o gimaangenggipa makkreni jat Huro ni rochakram biapba ong∙a ine uamang janapataha. Da∙o niamgri ro∙ong bikotenggipani a∙sel ia jolo janggi tangenggipa bang∙a jonturang dingtang biaprangchina jitangengjok aro ian SGH a∙jana gimaani ong∙enga ine uamang parakangaha.
Unbaksana rong∙terangko bikotna rama tarina kitgipa a∙arang chibimaona ruronge chiko nosto ka∙enga jean chibimani nitoaniko aro Garo Hills ni mikkim rasongko gimaatenga ineba uamang agandapangaha. Niamgri ro∙ong bikotna bil on∙gipako sandichina aro chu∙ongagita lekka bichitrang dongjagenchimode District Administration unbaksana Forest & Wildlife Departmentrang sandie kam ka∙china Tambu Sangma mol∙molataha. SGH a∙jani nitoaniko aro uno ma∙chakgipa jonturangko naljoke rakina man∙agita AOSW dolrang bil gnanggipa department rangko rong∙te bikotenggipako ta·rake champengatchina didianiko on∙angaha.
