Garo Hills ni gitalgipa NGO A∙chik Progressive Approach (APA) dol Williamnagar songjinmani Chisobibra IB o September jani 9 tariko tom∙aniko ong∙atangaha. Ia gitalgipa dolko mikkangchi A∙chik a∙songni namgnina re∙mikkange kamrangko ka∙angna, manderangna bil amadipet kakket aro bebeo dangdike on∙a ja∙kurangko de∙anggen ine APA ni President Francis C. Marak uamang dolni miksonganiko talate on∙angaha.
Tom∙anio Tura ni MDC aro APA ni Chief Adviser Bernard N. Marak, Congress ni dilgipa Champion R. Sangma, EGH ni politics o kam ka∙gipa Dr. P G. Momin aro gipin member rangba dongpae bakko ra∙angaha. Ia gitalgipa dolko re∙dilanio Adviser ong∙e mikkangchi namgipa miksonganirangko chusokatna kamrangko ka∙angnagita, A∙chik jatna aro a∙songni namgnina re∙mikkanganio ku∙monganiko on∙pachina gita Bernard Marak manderangko didiangaha.
Unbaksana, Congress ni dilgipa Champion R. Sangma-ba tom∙anio dongpae, mikkangchi APA dolni ka∙na nanggni kamrangko aro dolko bilakatani cholrangni bidingo aganangskaaha. Garo Hills-o je kamrang chu∙sokgija dongenggiparangko APA dol niroke kamko ka∙anggen ineba ua aganangaha.
