Sorkarini ong∙gija an∙tangni bilo chalaienggipa bida pakwatenggipa college rango gamna nangenggipa tangka paisarang dam rakbeani gimin ma∙aparangna aro chatro chatrirangna namen neng∙nikaniko on∙enga ine u∙ina man∙enga. Education Minister Rakkam Sangma ni agananigitade bang∙bata college rangan sorkarinigita deficit o dakchakaniko man∙giparang ong∙a ine u∙ina man∙aha. Iani bidingo Sangma pilak college rangko uamangni chatro chatrirangko gamatna ja∙rikenggipako sorkarina mesokchina didiataha ine parakangaha.
Mikkangchi pilak collegerango apsandake gamaniko ja∙rikgenma ine sing∙on Sangma iani gimin ja∙mano chanchianggen ine aganchakskaaha. Chatro chatrirangni adita neng∙nikanirangko olgrokatna aro bida pakwatchakramni miksonganiara poraia skianiko maming sinjetanigri on∙anisa ine aganenba, pilak college ni Principal rangko iani bidingo chanchirimna Sangma mol∙molangaha.
Dingtang dingtang dilgiparang, ma∙apa aro chatro chatrirangni neng∙nikaniko niatpachina mol∙molaniko dakangaha ine Sangma agandapangaha. Batanggimin salrango a∙dokni adita collegerango skigipani aro kam ka∙gipani kamrangna sorkari rakkianiko dakaha aro ian sorkarini bida a∙damrangko namdapatna kam ka∙aniko mesoka ine Sangma parakangaha.
