Ma∙mong sorkari DRIP project-ni gita chi bana kapenganiko namdapatna nangenggiparangoni Umiam chi ban kagipaba ge∙sa ong∙paa. Skanggipa phase-o chu∙gimik gong 180 crore chamataoniko gong 15 crore ko tender on∙aha ine MeECL-ni Managing Director Sanjay Goyal kobor ra∙timgiparangna parakataha.
DRIP-ni gita kam ka∙engon chi kapenganiko namdapatasan ong∙aigija badita bilsina ru∙ute baina gita tarina man∙gen, uarangkoba niroke kamrangko ka∙anggen aro mamong sorkarini gita gimikko porikka ra∙e kam ka∙na re∙mikkangani ong∙enga. Ia kamko 2025 bilsiona ka∙anggen aro somoi ko ra∙e kamrangko name ka∙na man∙aigen ine ua ka∙dongani kattarangkoba agandapangaha.
Umiam chi bana kapenganiko tarina bakso gni bosturangkode ra∙ongkatna taria matchotaha, indiba mitam baksorangko da∙o ministry-ona watate jensalo ra∙ongkatna taria matchotgen unode a∙doko kamrangko ka∙na a∙bachengatgnok. Da∙o dipetde Umiam chi bana kapenggipa-na maming kenna nangani dongjawa. Dingtang dingtang porikka ra∙e nianirangkoba dakatenga, maina manderangni naljokanina departmentni gita rakbee kamrangko ka∙enga ine Goyal aganangaha.
