Meghalaya Cricket Association ni bilsi 19 ni ning∙o me∙chikrangni Inter District Cricket Tournament Group B ni bon∙kamgipa kal∙aniko da∙al salni bako East Garo Hills DCA baksa South Garo Hills DCA ni gisepo Salpara o kal∙susaangaha. Ia kal∙susaanio EGH DCA dolni Senggamchi N Sangma ni gisik nange nambee kal∙anichi SGH DCA dolni kosako EGH DCA chenagita man∙angaha.
Senggamchi over 5 ni gisepon sak 6 wicket rangko ga∙akatna man∙aha jeon SGH DCA chu∙gimik 41 run rangkosan man∙e sirikaha. SGH DCA da∙alni kal∙anio sirikgenchimoba batanggimin changgni kal∙anio joljol amskaanichi skanggipa gadangon ong∙e dongkuainga maina EGH batanggimin kal∙anirango changgnian sirikskaaha.
EGH bisil godoanio chegipa ong∙e dokchengna tik ka∙e chu∙gimik 51 run rangko tariaha. Uamang dolni tarigimin run rang komigenchimoba SGH dolni dokgiparang, Senggamchi ni nambee robol goanirangchi chu∙gimik wicket rangko ga∙akate 41 run kosan man∙skaaiaha.
Skanggipa semi-final kal∙aniko Bristibar salo Ri-Bhoi baksa South Garo Hills kal∙anggen aro gnigipa semi-finalko Zone-1 Group B ni nambatgipa Shillong Cricket Association baksa Zone-2 ni Tura DCA Sukrobar salo kal∙angskagen.
