Garo Hills a∙jani pulis dolrang dingtang dingtang niam retirangni bidingo batanggimin salrangonin bajar antidamrango songantiona re∙roroe mikrakatani programrangko ong∙atangenga. Uamangni mongsonggipa ong∙e skie on∙enggiparangara Narcotic Drugs & Psychotrophic Substances (NDPS) Act, POCSO Act, me∙chikrangni kosako ong∙gija dakani aro Motor Vehicle Act ni bidingrango talate on∙anganiko dakenga. Apsandake South Garo Hills a∙jani pulis dolrang mijal salni bako ia niamrangni bidingo Siju antidamo manderangna agantalate on∙aniko dakangaha.
Ia programo pekatgipa bosturangko jakkalani aro badinganirangko champengna, POCSO Act nigita bilsi sokgijagiparangni kosako kragija dakanirangko u∙iatna, me∙chikrangni kosako ka∙namgija kam ka∙enggiparangko aro gari gora salanio dakna nanggni niamrangko ja·rikani bidingo agantalate on∙angaha. Una agreba songsalo janggi tanganio kraa bewalo meli nangrime dongani namgnirang aro cholrangko uamangna ku∙pattie on∙angjolaha. Pulis dolrangni skie on∙aniko knatimna bang∙a jolo songdonggipa manderang re∙bae bak ra∙anganikoba nikangna man∙aha.
