A∙dokni chadambe aro chatro chatrirangna janggi tangna ka∙e cha∙ani cholrangni bidingo Director of School Education & Literacy (DSEL) aro Samagra Shiksha ni State Project Director Swapnil Tembe skie on∙angna miksonganiko parakataha. Ia skie on∙aniko Facebook gita Education Department, Govt. of Meghalayani page-o online gita da∙al attamni 4 bajioni 5 bajiona gisiko nanggipa chadamberangna skie on∙anggen aro offline skianiko mikkangchi dakangna miksongangenga ine Tembe u∙iatangaha.
Ia skie on∙aniko a∙dokni pilak chadamberangna an∙tangtangna namgipa aro kragipa kamrangko basee ra∙china dakchakaniko on∙a miksonge dakangenga. A∙dokni Education Department chadamberangko iano bak ra∙e sing∙na nanganirangko sing∙e ra∙pachina dingtangmancha mol∙molaniko on∙ataha. Indakgipa skie on∙anirango bak ra∙e kamrangko basena jajae dongenggipa chadamberangna namgipa ja∙kurangko de∙e re∙mikkangna man∙agita ian namgipa chol ong∙enga.
