Health Minister Ampareen Lyngdoh, a·dok gimiko De-Addiction Centre rangko a∙bachengataniko dakangengaha aro ia project ko Social Welfare department ni ning·o a∙bachengatenga ine aganangaha. Ia centre rangko chalaina sorkarinigita dakchakaniko on∙anggen aro gipin dolrangni bakrimanikoba man∙gen ine Lyngdoh parakangaha. Damgittam centre rangko sorkarinigita dakchakanggen aro damgni centre rangko an∙tangtangni bilo chalaienggipa dolrang nirokangskagen ineba Lyngdoh u∙iatangaha. Unbaksana me·chikrangnaba apsan dakgipa centre rangko a·bachengatna nangchongmotenga maina da·onaba me·chikrangna indakgipa centre rang dongkujaenga ine Lyngdoh parakangaha.
Leader of Opposition (LO) Ronnie V. Lyngdoh, chadamberang pekatgipa bosturangko jakkale nosto ong·giparangko namaona ra·bapilna rehabilitation centre aro de-addiction centre rangko a∙bachengatna sing∙ani bidingo Health Minster aganchakaniko on·angaha. Ia centre rangko a·bachengatanio rehabilitation aro de-addiction centre ni gisepo apsan ine masisretjachina, unbaksana ia ge·gni centre rangko dingtang dingtang dake a·dok gimiko a∙bachengate on·chinagita Ronnie V. Lyngdoh janape agananangaha.
