Mijal salni bako bilsi 19 ni ning∙o ong∙gipa me·asarangni cricket kal∙anio Tura District Cricket Association (TDCA), 16 run rangchi South Garo Hills DCA rangko amataha. TDCA skanggipa dokchenge, 35.1 over o chu∙gimik sak 9 wicket rangko ga∙akate 107 run rangko man∙aha. Uamang 30 run rangko man·engmitingon sak bonga wicket rangko ga∙akataha.
Shahin Alone 21 run aro Darnell Sangma 11 run rangko sakgni dokanichi dolna run rangko ra∙dona dakchangaha. Bon∙kamao Agatchu Chetai K. Marak ni 15 run rangko man∙anichi dolko 100 na batna dilange TDCA na chena tariangaha. SGHDCA doloni robol gogiparangoni Salchang Sangma, Silgar M. Sangma sakgittam prak wicket rangko ra∙e aro Ayush M. Sangmani sakgni wicket rangko ra∙anichi TDCA ni name dakaniko champengna man∙aha.
Chena rikenggipa SGHDCA dolrang wicket 5 ko 13.3 over o ga∙akate 42 rangko man∙aha jeon mikka waani a∙selo kal∙ani nosto ong∙e, DLS ko jakkale ua over o 59 gapna nangani biapo sokdojae 16 run rangchi TDCA baksa sirikaha.
Zone gipin ni Umbuda Nongpoh o kal∙enggipao Ri-bhoi DCA dokchengenba namprete kal∙e wicket 8 rangko ga·akate 184 runrangko man∙angengon mikka waani a∙selo kal∙aniko dontongatna nangaha. Mikka waani a∙selo uamangni kal∙aniko a∙bachengna man∙jaha aro ka·la bijangchion dontongna nangao ga∙akaha.
Da∙alo Umbuda Ri∙bhoi o Zone I ni kal∙anio West Jaintia Hills DCA baksa East Khasi Hill DCA kal∙anggen aro Zone II Mendipathar Salpara o kal∙anio North Garo Hills DCA aro TDCA kal·angskagen.
