Nongkrem ni MLA Ardent Miller Basaiawmoit, a∙jatang chigatangko ripingani bidingo chanchirimaniko dakanio Meghalaya Transfer of Land Regulation Act, 1972 -ko niattaianiko dake niam pe∙anirangko champengna nanggipa ja∙ku de∙anirangko dakna gita nangenga ine janapangaha. A∙doko gipin jatrangni napbae a·arangko bree songdonganirangko Ribhoi a·jarango nikengani gimin iarangko champengnagita sorkari mai dakgipa ja·kurangko de·e champenganiko dakenga ineba ua sing∙doangaha. Ia kamrangko niroknagita Meghalaya a·dokoba Permanent Resident Certificate-ko jakkalnagita nanga aro niamrangko rakbate tarinagita nangenga ineba ua agandapangaha.
Excise aro Revenue Minister Kyrmen Shylla, Meghalaya Transfer of Land Regulation Act, 1972-ni bidingo niamrangko talatan baksana a∙dokni gam jin rangko ripingna aro mikkangchi a∙sel ong∙gnirangoniko champengna dingtang dingtang act rangni bidingoba talate on∙angaha.
Sorkarini ia kamrangko ka·anio constitution provision act ni niamrangko pe∙anirang dongkuja unbaksana PRC ko a∙jani gam jinrangko brea ba palani kamrangode jakkalja indiba poraia skiani bidingosa PRC ko jakkala ine Chief Minister Conrad Sangma u∙iatangaha. Land Regulation Act ni ning∙o neng∙nikanirangko nigrike mikkangchi namdapatna kamrangko ka∙anggen ineba Chief Minister agandapangaha.
