Chang 154 gipa Garo Hills Day ko mijal salni bako Tura District Auditorium o maniangaha. Ia salko dingtang mancha gisik ra·e maninagita ‘Aman A·song Awareness Cum Prayer’ ko ong∙atangaha. Ia tom∙anio Tura ni MDC Bernard Marak mongsonggipa sokgipa ong∙e Garo Hills ni itihas ni bidingo agantalate on∙angaha. 1869 bilsini September 24 tariko dilgiparang sorkari baksa songgigrike soi ka∙e ia salo Garo Hills jakgitelaniko man·aha ine Marak aganangaha. Uandake ia salon 1869 bilsio Garo Hills Act o pangchake Garo Hills ko district ona ra∙gataha ineba Marak agandapangaha.
Ia tom∙aniona a∙jani dingtang dingtang NGO dolrang, toromko dilenggiparang, chatro chatrirang aro dingtang dingtang gadangni manderangba bakko ra∙angtokaha. Garo Hills day ko katchabee maninagita adita git rangko kasrokbee ringanganikoba program o niknagitaba man∙angaha. Ia salko gisik ra∙anigita a∙songna janggi on∙chakgipa A∙chik jatni sianggimin matgrikrangna aro Manipur a∙dokna bi∙chakanikoba dakangaha.
