BCCI ni ong∙atnasienggipa bilsi 19 ni ning∙o me∙chikrangni one day trophy 2023-2024 cricket kal∙anio sak 15 kal·susagiparangni bimingrangko Meghalaya Cricket Association (MCA) seokaniko dakangaha. MCA dolna seokako man·giparang re·anggipa somoio bilsi 19 ni ning·o me·chikrangna Meghalaya a·dokni Inter District Cricket Tournament o dingtang dingtang a·jarangoni susaange nambate kal·giparang ong∙a. Ia kal∙susaaniko Gujarat songjinmao October ni 8 tarikoni 16 tarikona ong∙atanggen.
Ia kal∙susaanio bak ra∙na skang kal∙nakenggiparangko tarisamsonagita ia jani 25 tarikoni October 3 tarikona ong∙atangna tik ka∙angaha. Meghalaya cricket dolna seoka man∙gipa aro dakchakgiparang jemangan Shillong ni a·palo donggiparangko September 24 tariko sokbapachina MCA janapataha. Seokako man·gimin dolni sak 11 kal·nasigiparang October ni 5 tariko Gujarat ona re·anggen aro bangki sakbri kal·anio dakchaknasigiparang ja·mano re·angskagen ine MCA parakataha. Ia kal·susanasienggipa dolko Head Coach Ranjana Yadav, Assistant Coach Marty Mustafa, Trainer Helyna D. Sangma aro Physio Lucky Mary Marbaniang skie on·aniko dakangenga.
