West Garo Hills a∙jani Thakimagre Health & Wellness Centre-o mijal salo health mela-ko ong∙atangaha. Ia program-o manderangna dingtang dingtang sanna bannaniko on∙angan baksa an∙seng baljokani aro sanna bannani gamchatani bidingo skie on∙anirangkoba dakangjolaha. Unbaksana chatro chatrirangna be·enni an∙seng baljokanina aro mangrakanina yoga rangko ranta ka·na nangani bidingoba skie on∙angaha.
Health department ni gita PHC, CHC aro health centre rangonasan ong∙aija, a∙jani dingtang dingtang biaprangona re∙roroe an∙seng baljoke dongani bidingo skie on∙anganiko dakenga aro sanna bannani gamchatanirangkoba uamang u∙iate on∙a rakbee ku·cholsan kamko ka∙angenga.