Kerala, Kochi songjinmao mikron nikgijagiparangna International Football Tournament ong∙enggipao A∙chikrangoni saksa Klingson D. Marak India dolna kal∙na rimnapako man∙aha. Ia susaaniko da∙al saloni a∙bachengate October 2 tarikona ong∙atanggen jeon chu∙gimik dol 11 rangni susagrikaniko nikangna man∙anggen.
Meghalaya a∙dokoni saksa kamkam seokako man∙gipa Marak SWGH a∙jao Zikzak block ni ning∙o donggipa Rongsepgre songoni ong∙a. Ua saksa Garo Blind Football Club-ko a∙bachengdilgipa ong∙a jekon ua 2019 bilsio society ine segatna jotton ka∙dilgipaba ong∙a ine club ni Secretary Jhon Lavin Ch. Marak agananaha. Ua Subendro Rema aro Jenmi D. Marak ni depante ong∙a. Marak robol kal∙na ru∙utbea somoirangonin a∙bachengbaaha aro 2021-22 bilsio ua England, North America, Japan, Thailand aro Oman a∙songrango kal∙na cholko man∙angaha. 2016 bilsioba ua Indian Blind Football dolo kal∙na seokako man∙aha aro uni ja∙man ua Kochi ona changa sapaniko namdapatna rimanganiko man∙e nambatgipa ong∙e dakmesokangaha.
2017 bilsio a∙jatangni Election Department nigita Marak na Youth Icon ni boksisko pakwataha aro ia bilsio U Kiang Nangbah Award naba seokako man∙taiaha.
