Re∙baenggipa Lok Sabha election-o Shillong ni biapna National People’s Party baksa susaaniko dakna Voice of People’s Party (VPP) gitalkuenggipa dol ong∙enga, aro party ko chalaiani bidingo skie ra∙na nanganirang dongkuenga ine Cabinet Minister Rakkam Sangma September 26 tariko koborna parakataha. Lok Sabha election o chenagita VPP dol manderangni uamango ka·donganiko kim·kim ong·atchengna nanggen ine ua agandapangaha.
A∙songko sason ka∙anio maming dakeba jat baseani aro mikkang niani dongna nangjawa. Unbaksana dilgipa ong∙e kam ka∙engon a∙doko songdongenggipa jat ge∙antini ra∙chakako man∙gipa ong∙na gita nanga aro a∙dokni jat anti baksa meli nangrime kam ka∙nagita nanga. VPP Shillong ni biapna NPP baksa susaaniko dakna am∙engon altubea ong∙jawa, indiba namen rakbegipa susaani ong∙gen ine Rakkam Sangma parakangaha.
