Northeast a∙jarangni gisepo Meghalaya a∙dok ‘India Responsible Tourism State Award’ ko skanggipa changna Tourism department, a∙dok sorkari, Outlook Responsible Tourism Initiative dol baksa bakrime kam ka∙anichi sokachakna man∙aha. Ia programko World Tourism Day ko gisik ra∙e maniani salo ong∙atjolangaha. India Responsible Tourism State Award ko dingtang dingtang a∙bao tourism ko tang∙doatna kam ka∙enggiparangna uamangko mande ra∙agita ia awardko on∙angaha.
Garo Hills oni adita manderang aro dolrangba ia award rangko man∙angaha. Homestay rangna on∙gipa bako Do∙patchi Homestay gnigipa biapo ong∙e silver awardko man∙angaha. Bed and Breakfast-o Dongrama Homestay skanggipa biapo ga∙ake gold ko man∙aha. Travel Enterprise ni bako Wild Tour Garo Hills silver ko man∙angskaaha aro Architecture-o Sembertush A Sangma silver ko man∙aha. Grassroot Heroes ni bako Deepak N. Marak gold ko man∙angaha aro Cultural Ambassador o Ahowee dolrang silver awardko man∙angskaaha.
Tourism dayko manianio Tourism Minister Paul Lyngdoh, Tourism department ni Commissioner & Director Dr. Vijay Kumar, Tourism Director Cyril V. D. Diengdoh IAS dongpae Mission Statement, ku∙rachakani aro a∙dokni Homestay rangni Handbook ko oprake on∙angaha.
Programona dingtang dingtang joloni re∙bagiparang tourism ko baikame rakkianiko aro daitoko ra∙e ku·cholsan re·mikkangani bidingo aganangaha. Jatni daksninggipa bewalrangko, chasongna ja∙rikbaenggipa daka rikanirang aro maderangni bakrimaniko gamchate ra∙e agan ku∙patianikoba on∙angaha. Ia program o Madhya Pradesh, Khasmir aro Arunachal Pradesh a∙dokrangoni re·bae alda nokrangko chalaie chu∙sokgiparangni agananikoba nikangaha.
